Publicado originalmente en AgendaOccidente.es

Barreiros, 06 de outubro de 2026. O vindeiro domingo, 11 de outubro, a Praza do Concello de Barreiros acollerá o mercadiño no outono, unha xornada de encontro veciñal con preto de 40 postos de produtos de proximidade e máxima calidade, presentada polo Concello de Barreiros coa colaboración da Vicepresidencia da Deputación de Lugo.

Programa da xornada

A xornada comezará ás 11:00 horas coa apertura dos postos e a actuación do equipo de gaitas da Agrupación Folclórica O Arco da Vella. Ás 11:30 horas terá lugar o faladoiro Lambiscadas Científicas, con entrada libre, no que se abordarán as enfermidades transmitidas por carrachas en Galicia e as principais medidas de prevención.

Ás 12:00 horas, actuación musical en vivo de Lorena Doval & Manu Arroyo que amenizarán o ambiente do mercadiño. Media hora despois, ás 12:30 horas, darán comezo as degustacións de elaboracións feitas con produtos de razas autóctonas, enmarcadas no programa «Un gusto de rural, un rural degusto» da Vicepresidencia da Deputación de Lugo, en colaboración coa Federación de razas autóctonas de Galicia Boaga e a Asociación de criadores de raza porcina Celta ASOPORCEL. Como é habitual, todas as persoas que merquen nos postos recibirán un vale para participar na degustación.

Ás 13:00 horas, a Federación Rural Galega (FRUGA) presentará o Túnel do Viño, unha iniciativa dedicada en exclusiva aos viños tintos da provincia de Lugo co obxectivo de achegar ao público a riqueza e diversidade dos tintos lucenses.

En xornada de tarde, ás 17:00 horas, terá lugar o taller de cestería para elaborar un cesto de outono. O taller conta con prazas limitadas, polo que é necesaria inscrición previa no rexistro do Concello ata o venres 9 de outubro. Ás 17:30 horas haberá degustación de castañas asadas de balde e, ás 18:00 horas, propuestaes infantís abertas á cativada.

Para pechar a xornada, ás 19:30 horas actuará o Coro Airiños do Mar de Barreiros, antes do tradicional sorteo e peche do mercado ás 20:00 horas.

Unha xornada para toda a veciñanza

A alcaldesa Ana Ermida subliñou que «o mercadiño é moito máis que un espazo de compras; é un lugar de encontro onde a veciñanza se reúne para desfrutar dunha xornada diferente. Estamos moi satisfeitos coa programación que preparamos para este outono, con propuestaes para todos os públicos e idades.»

Pola súa banda, o concelleiro de dinamización e deputado provincial, Dani García, destacou que «cada edición tentamos ofrecer algo novo que sorprenda á xente que se achega ao mercadiño. Contar coa participación de entidades como FRUGA ou a presenza das razas autóctonas demostra o vínculo que temos co rural e cos produtos da nosa terra.»